Panandaliang kaibigan

by Sankage Steno

Nagpapausok ako sa labas ng mall. Kasabay nito, pinapanood ko yung mga langgam na pinagtutulungang buhatin yung patay na bubuyog papunta sa kaharian nila. A queen bee for the queen ant, I thought. Ang gara ng buhay.

Habang nalilibang ako sa dalawang ginagawa ko, biglang may lumapit na lalaki sa ‘kin, payat, may chance na pangit (o pumogi balang araw) at nagsisimula nang tubuan ng bigote. Hiniram n’ya yung lighter ko. Binigay ko naman.

“Patago rin dito ha?” sabi n’ya. “Bawal kasing magyosi sa loob ng mall. Pinapalabas ako.”

“Malamang,” sabi ko sa isip ko.

“Naaamoy ako nung mga gwardya e.”

“Dito ka ba nagtatarbaho?”

“Hindi. Yung mama ko dito pumapasok. Sa Jollibee s’ya. Umabsent lang ako ngayon sa school kasi walang pambaon. Dito muna ako, samahan ko si mama.”

“Anong year ka na?”

“Grade 8.”

“Bata ka pa pala.”

“Ikaw ilang taon ka na?” tanong n’ya.

“Hulaan mo,” udyok ko.

“20?”

Hallelujah!

Sinabi pa n’ya kung sa’n s’ya nag-aaral, kung sa’n s’ya nakatira, kung anong oras ang pasok ng mama n’ya, kung ano ginagawa nilang dalawa araw-araw bago pumasok, kung ano yung yosi ng mama n’ya at kung sa’n n’ya yun binibili—sa 7 Eleven.

“Anong pangalan mo?” tanong ko.

“Jhigger.”

“Ha? Anong spelling?”

“J…” natigilan s’ya. “J-H-I-G-G-E-R.”

“Talagang napaisip ka pa sa pangalan mo?”

“Nalilito kasi ako sa G saka sa J.”

Natapos kaming magyosi. Tinago ko yung upos sa kahon ng sigarilyo; tinapon n’ya yung kanya sa isang sulok ng gusali ng mall.

“Mamaya pa tayo makakapasok, mga 30 minutes. Maaamoy kasi ng guard.”

“Kailangan ko nang bumalik. Walang nakabantay sa computer ko.”

Naintindihan naman n’ya yung concern ko, kaya sumugal na s’ya. Pumasok s’ya sa glass door, diretso sa buffer zone, sa metal detector, sa gwardyang kinapkapan s’ya, ta’s sa loob. Success. Napatingin s’ya sa ‘kin. Ngumiti ako at pumasok na rin sa loob. Success din.

“Very nice,” sabi ko kay Jhigger. “O pa’no, dito na ‘ko.”

“Sige.”

“Sige.”

Malakas ang kutob kong iyon na ang una at huli naming pagkikita ni Jhigger.