Sakit ng mga bakla

by Sankage Steno

E binubugaw kasi ako ng mga kaibigan ko kahapon sa isang someone, so naki-ride naman ako. Panay ang sabi nila ng magagandang qualities nitong nirereto nila sa ‘kin, ako naman, kinikilig kunwari. Patay na patay kuno.

“Ang dali mo namang ma-in love,” sabi ng isa kong kaibigan.

“Ganun talaga,” sagot ko. “Sakit ‘yan ng mga bakla.”

“E di bakla rin ako?” banat ng kaibigan kong babae.

Lilinawin ko lang, ha? Hindi sakit ang pagiging bakla. Hindi rin ito kasalanan o kapintasan. Walang mali o masama sa pagiging bakla (o lesbian, trans, atbp.). Ang tinutukoy kong “sakit” e yung tendency nating mahulog agad ang loob sa isang lalaki kahit sa napakaliliit na katangian o gawi.

Biro lang naman iyon dahil hindi naman talaga sakit o karamdaman ang ma-in love agad-agad sa isang tao. Nagkakataon lang na dahil hindi pa tanggap ang mga bakla sa lipunan, marami ang natatakot magpahayag ng damdamin. Marami ang repressed ang feelings. At dahil kinukubli o pinipigilan lagi ang nararamdaman, kapag may isang nagpakita ng motibo o nagbigay ng atensyon, “mahal” na agad.

E ano bang masama kung madali kang ma-in love?

Wala.

Yun nga lang, kapag hindi nasuklian ang pagtingin, made-depress nang bonggang-bongga. Feeling mo, pinaasa ka na, e ikaw naman talaga ‘tong umasa. Feeling mo, ang sama-sama na nung taong ‘yon. Assumerong frog din kasi tayo minsan. Ayan tuloy, andali rin nating masaktan. Nagiging overly sensitive tayo at kumakapit sa mga hugot lines o jokes. Yung iba, dun na talaga umaasa para mag-survive.

Haynako.

Kaya ko nasabing sakit s’ya ng mga bakla. Ikaw ba naman ang mapaibig agad, umasa, dumamoves, ma-reject, ma-depress at maluka, masisisi mo ba ‘ko kung isipin kong karamdaman nga ‘yon? Pero sabi ko nga, biro lang. At gaya ng karamihan sa mga jokes, they’re half-meant.

Kasi naman, ang hirap ding manligaw o magpaligaw kapag bakla ka. Iisipin mo muna ang iisipin ng ibang tao. Uunahin mo muna yung magiging tingin ng lipunan kesa sa sarili mong pagtingin. Sa sarili mong nararamdaman. May mali rin talaga sa mundo natin. At hindi mo rin masisisi ang mga bakla (at pati na rin yung ibang tao) kung bakit madali silang ma-in love.

E wala, sabik e.

Advertisements