Mahal ko kayo

by Sankage Steno

Bago pa dumating ang Big One, gusto ko lang sabihin sa inyong lahat na mahal na mahal ko kayo. Sa lahat ng mga ex ko, pinapatawad ko na kayo. Sa lahat ng may utang sa akin, hindi ko na kailangan ng perang ‘yan. Sa lahat ng mga taong hindi ko na nakakausap, pasensya na.

Sa aking pamilya, kayo ang aking lakas. Maraming, maraming salamat sa pagmamahal at pag-aaruga sa akin. Sa mga kaibigan ko, kayo ang aking sandigan. Salamat sa lahat ng sandaling pinasaya at dinamayan ninyo ako. Sa aking mga katrabaho at estudyante, salamat sa mga pinagsamahan natin.

Higit sa lahat, sa nagpapatibok ng aking puso, walang saysay ang buhay ko kung hindi kita nakilala. Ikaw ang una’t huling taong naisip ko sa naganap na lindol. Salamat sa pagyanig ng aking buhay… at kama.

Gusto ko ring samantalahin ang pagkakataon para humingi ng tawad sa lahat ng taong nasaktan ko, naisawalang-bahala at hindi minahal. Sinadya ko man o hindi ang mga nagawa/ginawa ko, makuha niyo sanang patawarin ako. Masyadong maikli ang buhay para magkimkim ng galit o sama ng loob. Let bygones be bygones.

Paumanhin kung masyado akong madamdamin ngayon. Buhay pa ako, oo, pero hindi ko alam kung sa susunod na lindol ay mabubuhay pa rin ako. Kaya minabuti ko nang unahan ito at sabihin ang nararamdaman ko ngayon. Ayokong magsisi sa huli. Pero mas ayokong maranasan na hindi man lang ako makakapagsisi sa huli dahil wala na ako.

Muli, sa inyong lahat, salamat. Mahal na mahal ko kayo… except kayong mga fanatic at trolls, lalong-lalo na yung mga nagpapakalat ng fake news. Mauna sana kayong mamatay sa lindol. #Charot

Advertisements